Энэхүү арван тахилаар эрхэм гурван эрдэнийг тахивал төгс төгөлдөр тахил болдог. Эдгээр тахилыг өргөхөд санаа бодол нэн чухал. Гурван эрдэнийн алинд нь ч их, бага ямар ч тахил өргөсаөн болно. Харин зургаан зүйлийг бодож бай. Тэгвэл үр дүн нь тоочихын аргагүй нэмэгдэнэ. Тахил өргөхдөө дараах зүйлийг бод: 1, Үүнээс илүү эрхэм сайн чанартай зүйл үгүй 2, Үүнээс илүү түшиг тулгуур байхгүй 3, Тэр бол амьтан бүгдийн дээд нь 4, Удамбар цэцэг шиг ховор 5, Гурван мянган орчлон ертөнцөд ганц заларсан учир орь ганцхан 6, Ерийн ба ер бусын хамаг сайн сайхан бүхэн төгс цогцолсон Бодисадвагийн төвшин номд бичсэн дагуу үүнийг дурьдлаа. Эдгээр тахилыг байнга зохих ёсоор нь өргө. Шашны баяр, дүйцэн өдрүүдэд чадах чинээгээрээ сайн тахил өргө. Бид үргэлж идэж, ууж байдаг. Тиймээс байнга идээ, ундааныхаа дээжийг өргөж бай. Тэгвэл төвөг багатай их буян хуримтлуудаг. Тиймээс уснаас өгсүүлээд идэж, ууж, буй зүйлийнхээ дээжийг чин сэтгэлээсээ өргө. Шарава ингэж сургасан байдаг: Хоолны хөгцөрч муудсан хэсэг, цайны шарласан навчийг бус аль сайнаас нь өргө. Цай уух болгондоо сэржимдэхийн төдий цацах нь тахил биш. гэсэн бол сударт: Үржил шимтэй хөрсийг хагалаад цаг тухайд нь үр цацалгүй орхиж болохгүй. Үүн шиг энэ ба хойд насны амар амгалан бүхэн соёолох гэгээн талбайд эргэх дөрвөн улиралд амгалан жаргалангийн үр цацах хэрэгтэй. Сүсгийн анжисаар шан татаж, буяны үр суулга. Энэ үрийг суулгахгүй бол үгээгүй ядуу хоцроно. Түүнчлэн Магтвал зохигчийн магтаал-д: Будда тан шиг өгөөмөр хишигтэн Гурван ертөнцийн хаа нь ч байхгүй Бурхан бүгдийн оройн дээдэд Гагцхүү та л залардаг билээ.
Эцэс төгсгөлгүй хөх огторгуйн Эн хэмжээг жиших аргагүй шиг Танд тусалсан, хорлосон үйлийн Гарцаагүй гарах үрийг хэмжишгүй хэмээн айлджээ. Эрхэм дээд энэ буяны орон зайд эгэл жирийн юм гэж өчүүхэн төдий ч байхгүй. Харин бидэнд ийм шинж чанар огт байдаггүй тул эрхэм гурван эрдэнийг үргэлж хичээнгүйлэн тахи. Тэгвэл энэхүү гэгээн орон зайн нөлөөгөөр зөв дадал соёолон, зам мөрийн шат бүхэнд дотоод хөгжил улам нэмэгдэнэ. Сонссоноо тогтоохгүй, бодоод ч ойлгохгүй, бясалгаад ч өөриймшүүлж чадахгүй, ерөөсөө оюуны чадвар хүрэхгүй байгаа нөхцөлд буян хуримтлуулах энэ аргыг хэрэглэ. Энэ бол дагавал зохих заавар журам шүү. Энэ тухай хутагт Майдар: Яруу магтаалын дээдэд таацах Ялж төгс нөгцөгчийг дуулахад Яндашгүй их эрхэм чанарууд Яг л хаврын ногоо шиг ургана. хэмээн өгүүлсэн билээ. Энэ бол тахил гэдэг зөвхөн эд зүйл бус бидний сүсэг бишрэл гэсэн санаа юм. Тиймээс сүсэг байвал мандал, усаар ч тахил өргөж болно. Тэр бүү хэл санаанд оромгүй зүйлээр ч тахил өргөж болно. Хэрвээ эд юм байхгүй бол тийм тахил өргөөрэй. Харин юмтай хэрнээ харамлаж “ Надад буян гэх юм юу байх вэ, Би ядуу хоосон хүн, тахил өргөх зүйл байхгүй” гэж халтар аяганд ганц нэг өвс хийчихээд “Энэ бол гавар, зандантай ус” гэж нэрлэдэг. Энэ бол сохор хүн хараатай хүнийг хуурах гэсэнтэй л адилхан шүү гэж Бодова сургаж байсан. Пүчүнва “Би анхандаа хурц эвгүй үнэртэй өвс өргөдөг байлаа. Дараа нь дөрвөн үнэртэн хольсон хүж өргөх боломжтой болсон. Одоо агар, дүрүга мэтийн тансаг үнэртэн өргөдөг” гэсэн байдаг. Өөрөө өргөлөө чамлавал насан туршдаа тахил өргөж чадахгүй. Тиймээс өчүүхэн зүйлээр эхлэлээ ч хичээвэл улам бүр нэмэгдэх болно. Пүчүнвагаас үлгэр дууриал авах хэрэгтэй. Түүнийг хожим хорин хоёр алтан зоосоор хүж авч, тахил өргөж байсан гэлцдэг. Хувилгаан шидийг олсон агуу бодисадва нар биеэ хэдэн түм хувилган, бие тус бүрээ зууг гартай болгон бясалгадаг. Ингээд орчлон ертөнцөд оршин буй гэгээрэгсдийг олон гавлаар тахидаг, үүнтэй өөрийгөө харьцуулж “Би иймхэн тахил өргөөд гэгээрэлд хүрэхгүй юм байна” гэж өөрт буй жаахан ч болов сайн талаа чамалдаг. Энэ бол номлолыг дутуу дулимаг ойлгосон хүний үг. Эрдэнийн тансаг үүл номд өгүүлснийг баримталбал зохино. Судрын чиглэлийн ном зохиолоос агуу тахил болон өргөмжлөн хүндлэх тухай судла. Тэгээд чин сэтгэлээсээ, зүрхнийхээ угаас гэгээрэгсэд ба бодисадва нари тахил өргө. хэмээн тэнд өгүүлдэг. в, Их энэрэгүй сэтгэлийг бодож амьтан бүхнээр аврал эрүүлэх Энэрэнгүй сэтгэлийн үүднээс бусад амьтныг аврал эрэх журамд чадах чинээгээрээ сургана. г, Аливаа тохиолдолд ямар ч хэрэг гарсан эгэл жирийн арга хэрэглэлгүй гурван эрдэнийг тахин залбирна. Аливаа тохиолдолд, ямар ч ажил үйл хийсэн зөвхөн эрхэм Гурван эрдэнэд найдах хэрэгтэй.Гурван эрдэнийг зохих ёсоор нь тахи. Гурван эрдэнэтэй эс зохилдох бөө, удган мэтэд ямар ч тохиолдолд найдвар тавьж болохгүй. Сэтгэлээ тэр чигт нь зөвхөн эрхэм Гурван эрдэнэд тушаа. д, Аврал эрэхийн ач тусыг санан өдөр гурав, шөнө гурав аврал эрэх Аврал эрэхийн ач тусыг Хураангуй заавар журам болон тусгай заавар журмын дагуу тайлбарлана. “Хураагуй заавар журам-д дурьдсан ач тус Үүнийг хоёр хэсэг дөрвөн зүйлээр тайлбарлана. а: Эхний дөрвөн зүйл 1: Агуу их буян хураана. Үхэшгүй хэнгэрэгийн дхарини-д: Ялж төгс нөгчсөн Буддаг Гэнэн ч, хэрсүү ч төсөөлж баршгүй Ялгуун гэгээрлийн номлол сургаалийг нь Гэнэтдээ ч, аажимдаа ч төсөөлж баршгүй Үргэлж ямагт сайн мөртэй Бурсан хуврагуудын оюуныг ч төсөөлшгүй Үнэн сэтгэлээр тэдгээрт сүсэглэхийн Үр шим, хишгийг ч төсөөлшгүй. Мөн Төгс чанарын хураангуй-д: Агуу уужим далайн усыг Алгаараа хутган хэмжиж болохгүй Аврал эрэх буяныг биежүүлбээс Ахуй гурван ертөнцөд багтахгүй. гэхчилэн сургадаг. 2: Баяр баясгалан, дээд ханамж таашаал эдэлнэ Санаж бодохын цоморлиг-т: Өдөр шөнийн алинд ч болов Энэрэгч Буддаг бодох аваас Өршөөл энэрлийг гуйх аваас Ирэх төрөлдөө хүн болно. гэсэн байдаг. Буддагаас ийн аврал эрдэг шигээ нөгөө хоёр эрдэнээс ийм бодолтой аврал эрэх хэрэгтэй. “ Авралын гурван шүтээнтэй болсон нь миний хувьд ховорхон олз” хэмээн бодож баярла. 3: Сэтгэлийн төвлөрөлд хүрнэ мөн 4: Сэтгэл ариусна Сэтгэл төвлөрүүлэх ба билэг оюуны заавар журам эзэмшин нирваанд хүрнэ. б” Дараагийн дөрвөн зүйл 1” Маш том өмгөөлөлттэй болно. Үүнийг хожим өөр бүлэгт тайлбарлана. 2” Бүх алдаатай буруу үзэл багасч улмаар арилна Гурван эрдэнээс аврал эрснээр буруу багш, буруу номлол, муу нөхөр зэрэгт итгэн, тэднээс аврал эрж хураасан муу үйлийн үр багасах буюу арилна. 3” Оюунлаг суутнуудын эгнээнд багтана Тэднээс аврал эрвэл оюунлаг суутнуудын нэг болно. 4” Буддын номлолыг таашаагч тэнгэр, хүмүүсийн талархал хүлээнэ Төгс гэгээрэгсдийн эгнээнд багтсанаар багш болон бусад нөхөд чинь баярлана. Харин тэнгэр баярладгийн учир гэвэл тэд “ Бид хүн байхдаа аврал эрдэг байсан. Тэгээд төрөл арилжин энд төрсөн. Тиймээс ахин дахин аврал эрж буй энэ хүн бидний нөхөр болох нь” хэмээн баярлаж, сайшаадаг. “ Бусад гарын авлагад дурьдсан ач тус Гурван эрдэнээс аврал эрэхийн ач тусыг бусад гарын авлагад найман зүйлээр тоочсон байдаг. а, Будын шашинтан болно Буддын ба бусад шашин олон зүйлээр ялгаатай Адиша, Шантипа нар аврал эрдгээрээ бусдаас ялгаатай гэж үзсэн байдаг. Анхлан аврал эрж цаашдаа ч түүнийг орхиогүй бол буддын шашинтан болно. Тиймээс буддын шашинтан болмогцоо эрхэм гурван эрдэнийг миний багш хэмээн үнэн голоосоо хүлээн зөвшөөр. Харин ингэж чадахгүй бол ямар ч зөв дадал төлөвшүүлээд буддын шашинтан болохгүй. б, Сахил бүхнийг авах бололцоо нээгдэнэ Абхидхармакошагийн тайлбар-т: Аврал эрсэн хэн боловч жинхэнэ утгаар нь бүх сахил авах үүдээ нээдэг. Аврал эрэх далан шүлэг-т: Гурван эрдэнэд өөрийгөө даатгагч жирийн сүсэгтэн найман төрлийн сахилаас авч болно. Энэ нь Гурван эрдэнээс аврал эрсэн хүний нирваанд хүрэх хүслийг сахил жинхэнэ утгаар нь хангана гэсэн үг юм. в, Урьд хуримтлагдсан хилэнц нимгэрч, барагдана Хураангуй заавар журам-д аврал эрэн, гэмээ арилгахаар суралцаж байвал: Гахайны домгийг жишээ болгон дагах нь зүйтэй гэсэн байдаг. Тэр домогт хойд насандаа гахай болж төрөх байсан тэнгэрийн хүү аврал эрсний хүчинд гахай болоогүй тухай өгүүлдэг. Тиймээс аврал эрвэл муу заяанд төрөх шалтгаан арилдаг. Энэ тухай:
Буддагаас аврал эрсэн хэн ч Муу заяанд төрөх учиргүй. Хүний энэхэн биеэ орхисон ч Тэнгэрийн төрлийг олно. Мөн номлол болон хуврагаас аврал эрэх нь үүнтэй адил үр дүнтэй гэж тэнд өгүүлжээ. Тиймээс урьд хуримтлагдсан гэм нимгэрч арилдаг. г, Агуу буян хураана Энэ тухай өмнө нь тодорхой өгүүлсэн. д, Муу заяанд төрөхгүй Үүнийг өмнө өгүүлснээс сайн ойлгож ав. е, Хүн ба хүнээс бусдын хорлолд өртөхгүй Энэ тухай сударт: Ухаангүй мэгдэж, балмагдах хүмүүс Уулын савдагаас аврал эрдэг ээ Удган мод, тахисан овооноос Учир эрж, аврал гуйдаг аа. Авралын дээд нь тэнд байхгүй ээ Ачлалт гэгээрэл тэнд оршихгүй ээ Амь шигээ үнэнчээр шүтлээ ч гэсэн Ахуй орчлонгийн зовлонгоос салгахгүй ээ Харин та аврагч Буддад Хамгаас үнэн Номлол сургаалд Хайрлан энэрэгч бурсан Хуврагт Хандаж сүслэвээс зовлон арилна. Найман зөв дадлыг мөрдөх нь Үлэмжийн дөрвөн үнэнд хүргэнэ. Найдвар төрүүлж оюуныг чинь хөтөлж Үнэхээр чамайг нирваанд хүргэнэ. Аврал бүгдийн дээд нь энэ Авралыг төрүүлэгч туйл нь энэ Ийм авралыг түшсэн хэн ч Энэ хорвоогийн зовлонгоос сална. гэсэн нь буй. Үүнийг “Шидэт цалам” хэмээх буддын бус сургаалаас аврал эрсэн нэгний домогтой харьцуулан ойлгоорой. ё, Хүссэн бүхэн биелэнэ. Шашин номлолын аливаа үйл эхлэхийн өмнө эрхэм Гурван эрдэнээс аврал эрэн тухайн зүйлээ биелээсэй хэмээн залбирч бай. Тэгвэл хялбархан бүтнэ. ж, Төгс гэгээрлийн төвшинд хурдан хүрнэ. Арсланд өгсөн хариул-т: Сүсэгтэй бол золгүй заяанд төрдөггүй. Бид онцгой завшаантай тавиланд төрчихөөөд байна. Одоо Гурван эрдэнээс аврал эрж, гайхамшигт сургаалыг нь дагавал төгс гэгээрлийн төвшинд хурдан хүрнэ. Ач тусыг нь энэ маягаар бод. Тэгээд хоногтоо өдөр нь гурав, шөнө нь гурван удаа аврал эр. Е, Эрхэм гурван эрдэнийг тоглоом төдийд орхилгүй үнэнч байх мөн аминд тулсан ч үл татгалзах Амь нас, бие махбод, хөрөнгө хогшлын аль нь ч хорогдож дуусдаг. Харин ийм зүйлээс болж Гурван эрдэнээс татгалзвал төрөл тутамдаа тасралтгүй зовно. Тиймээс юу ч тохиолдсон эрсэн аварлаасаа няцахгүй гэж олон дахин андгайл. Тоглоом наадмын төдийд ч Гурван эрдэнээс татгалзсан утгатай үг бүү хэл. Хаа нэг тийшээ явахдаа Буддагаас аврал эр гэж багш нар маань сургадаг байсан. Гэхдээ би энэ талаар өгүүлсэн эх зохиол олж үзээгүй. Харин Адишагийн Гэгээрлийн замыг гэрэлтүүлэгчийн тайлбар-т зургаан ерөнхий журам бий. Мөн бусад гурван журмыг судраас авч тайлбарлана. Үлдсэн гурвыг нь Аврал эрэх зургаан зан үйлийг баримтлан үзүүлнэ. Тэнд: Шад номыг ч, лагшин дүрсийг ч Шар орхимж нөмөрсөн хэнийг ч Басамжилж огт болохгүй ээ Багш мэт дээдлэн хүндэл ээ. Айлдсан сургаал номыг нь Адис аван оройдоо зал. Гэгээрсэн эсэхийг нь ялгахгүй тул Гэгээн дээдэс мэт хүндэлвэл зохино. хэмээсэн байдаг. Нотлон буулгах хураангуй-д буй журмын талаар Гамаба: “Энэ журмыг Ниүсүрва гаргаагүй. Бид хоёр хамтдаа Гонбава багшаас сонссон” гэсэн байдаг. Харин энэ журам Гонбава багшийн Лүмбавад дамжуулсан гэгээрлийн сургаалд багтжээ. Энэ журмыг зөрчвөл эрсэн аврал суларч, улмаар түүнийг алдах шалтгаан болно гэж үздэг. Зарим нэг нь тусгай журмын эхний гурав, дээр нь байнга аврал эрэх, аминд тулсан ч үл орхи. Гурван эрдэнэд тахил өргөх гурвыг нэмдэг. Ингээд энэ зургааг зөрчвөл аврал эрэх журам алдагдсан гэж үздэг. Зарим нь өөр өөрийн журмын сүүлийн гурвыг үүн дээр нэмдэг. Тэгээд нийт есөн зүйлийг зөрчвөл аварлаа алдсан гэж тооцдог. Харин бусад журмыг зөрчвөл авралын хүч сулардаг хэмээн үздэг билээ. Гэхдээ аминд тулсан ч орхихгүй гэдэг журмыг зөрчвөл гарцаагүй авралаа алдана. Тэрчлэн эрхэм Гурван эрдэнээс аврал эрдэг атлаа өөр шашныг хүлээн зөвшөөрч хоёрдмол хандлага гаргавал мөн л авралгүй хоцорно. Ингэвэл бусдаас аврал эрэхгүй гэдэг журмыг зөрчсөн хэрэг болно. Мөн гурван эрдэнийн авралд бүрэн итгээгүйн илрэл юм. Харин бусад тохиолдолд зөвхөн аврал эрэх журам зөрчигдөнө. Түүнээс биш авралаа алдахгүй гэж бодож байна. Ерөөсөө Гурван эрдэнээс аврал эрэх нь буддын шашинд орох үүд билээ. Аврал эрэхдээ хоосон дүр эсгэлгүй, үнэн голоосооо хандвал гайхамшигтай эрч хүч өгнө. Тэр цагт дотоод, гадаад ямар ч бэрхшээлд нугарахгүй. Онцгой сайн чанарыг ч хялбархан эзэмшинэ. Эзэмшсэн нь алдагдахгүй улам бүр нэмэгдэх болно. Тиймээс дээр дурьдсан тохиолдож болзошгүй аюулаас сэрэмжил. Мөн гурван эрдэнийн эрхэм чанарыг санаж бод. Тэдгээр талуудыг нь онцлон аврал эр. Тэгээд аврал эрэх ёс журмаас гажихгүйг хичээ. Асуулт: Үхэх нь гарцаагүй гэдэг бодолтой боллоо. Үхээл муу заяанд төрөхөөс эмээдэг. Түүнээс эрхэм Гурван эрдэнэ л аварна. Тэгээд Гурван эрдэнээс аврал эрлээ. Аврал эрэх ёс журмыг огт зөрчсөнгүй. Харин яаж аврах юм бэ? Хариулт: Цоморлиг-т: ингэж өгүүлдэг юм: Ахуй орчлонгийн ёсыг таньсан Амьтны зовлонгоос салгах хөтөч би Ашдын зам мөрийг чинь заалаа Араас дагах нь та нарын хэрэг ээ. Будда бол авралыг заагч багш. Хувраг нь авралд хүргэх анд. Харин эрхэм нандин номлол бол жинхэнэ аврал билээ. Түүнийг өөрийн болгосон цагт аюулаас ангижирна. Гэхдээ номлолыг нэг амьсгаагаар бүрэн эзэмшчихдэггүй. Ганц нэг алдаа дутагдлаас салж, ганц нэг сайн чанар эзэмшин дээшлэх замаар суралцаж эхэлдэг. Ингээд улам ахисаар онцгой дээд төвшинд хүрнэ. Тиймээс одоо зөв, буруу дадал тэдгээрийн үр дагаварын тухай сайн мэдэж авах хэрэгтэй. Улмаар авах, гээх журмыг ёсчлон биелүүлж номлолд суралцах нь зүйтэй. Зөв, буруу хоёр үйлийн үр дагаврыг алсуур бодож зөв алхам хийхгүй бол муу заяанд төрнө. Муу заяанаас айж эмээлээ гээд аюулаас мултрахгүй. Буруу дадлаас сэтгэлээ хөндийрүүлэх нь үр дагавар буюу муу заяанаас аврагдах нөхцөл юм. Харин энэ нь үйлийн үрд итгэж үнэмшихээс шууд шалтгаалдаг. Эхийг шивж бэлтгэсэн. Ц.Нармандах
БОДЬ МӨРИЙН ЗЭРЭГ буюу гэгээрэлд хүрэх зам: Бүлэг ХII - АВРАЛ ЭРЭХ ЖУРАМ